_____________________________________________________________________________________________
Болот Байрышев. Пазырык
Таш корумга курчадып
Jебрен Алтай туjырайт
Корум ташты jастанып
Батырларым уйуктайт
Кайчыларым jулыжып
Кай-чӧрчӧгин чӧрчӧктӧйт
Мӱркӱт акшыйт корумда
Батырларым ойгонор
Кӱмӱш уйген суркурап
Аргымагыҥ сакып jат
Кылбыш-jыдаҥ тудунып
Алтайыҥды эбирзеҥ
Узун тӱндер ӧткӱре
Улу чӧрчӧк чӱмделет
Кӱркӱреген ол кайдаҥ
Кабай Алтай jайканат
Чаганалу агаштыҥ
Чаганазын кургатпа
Эки кылду топшурдыҥ
Эдиски ӱнин сен ӱспе
Улу Алтай батырлар
Ундулкалбазын калак
Jаш ӱйеге чӧрчӧгис
Jажын чакка jаҥылгай.
_____________________________________________________________________________________________
| 
